സൗഹ്യദത്താൽചുറ്റപ്പെട്ട നമ്മെ കടന്നുപോകരുതെന്നാശിച്ച ആ കാമ്പസ് ദിനങ്ങൾ എത്ര മനോഹരം .ക്ലാസ് മുറികളുടെയും ലൈബ്രറിയുടേയും കാന്റീനിറ്റേയും തണൽ വിരിച്ച മരങ്ങളുടേയും പശ്ചാത്തലത്തിൽ സൗഹ്യദവും പ്രണയവും അരങ്ങുതീർത്ത ആ ദിനങ്ങൾ നമുക്ക് സമ്മാനിച്ചത് അവർണ്ണനീയമായ ഒരായിരം ഓർമ്മകൾ .
ഞങ്ങൾ മുറിവേൽപ്പിച്ച ഡസ്ക്കുകളും ചുവരുകളും ഒരിക്കലും പരിഭവങ്ങൾ പറഞ്ഞിട്ടില്ല.കോറിയിട്ട ആ വാക്കുകളെ ഇന്നും അവ കാത്തുസൂക്ഷിക്കുന്നു .തലച്ചോറ് മരവിക്കുമ്പോൾ ചിന്തകൾക്കുള്ള മേച്ചിൽപ്പുറങ്ങൾ കാണിച്ചുതരാൻ ജനൽപ്പാളികൾ ഒരിക്കലും മടികാണിച്ചിട്ടില്ല.ചിലപ്പോൾ സ്ത്രീ സൗന്ദര്യത്തിലേക്ക്, പച്ചവിരിച്ച നെൽപ്പാടങ്ങളിലേക്ക് , മൂടൽമഞ്ഞിനെ ചുംബിക്കുന്ന കുന്നുകളിലേക്ക് .
എഞ്ചിനീയറിംഗ് പ്രതീക്ഷകളുടേതുമാറി സപ്പ്ളികളുടേതായപ്പോൾ ലഹരിയും കൂട്ടുകാരനായി. ലഹരികളിൽ വെള്ളം ചേർക്കുമ്പോൾ അവിടെ മനസ്സുകൾതമ്മിൽ ലയിക്കുകയും സൗഹ്യദത്തിന്റെ വീര്യം കൂടുകയുമായിരുന്നു ലഹരി പകർന്നുതന്ന ഗ്ലാസ്സിൽപ്പോലും ഒരായിരം ഓർമ്മകൾ തങ്ങിനിൽക്കുന്നു. ജീവനുള്ള, ഹ്യദയമിടിപ്പുള്ള ആ ഓർമകൾ രക്തതുള്ളികളിലേക്ക് ഇറങ്ങിച്ചെല്ലുമ്പോൾ, മനസ്സിന്റെ കടലാഴങ്ങളിൽനിന്നും തലച്ചോറിന്റെ കരയിലേക്ക് കൂറ്റൻ തിരമാലകളായി അവ ആർത്തടിക്കുമ്പോൾ അറിയാതെനാം ആ സൗഹ്യദത്തിന്റെ ലഹരിയിൽ വീണുപോകുന്നു.
ഈ വസന്തകാലംമതി വരാനിരിക്കുന്ന വേനലിൽ തളരാതിരിക്കാൻ. ആ വസന്തത്തിൽ കൊഴിഞ്ഞുപ്പോയ നിമിഷപുഷ്പങ്ങൾമതി ഓർത്തുവെക്കുവാൻ.ഞങ്ങൾ അറിഞ്ഞിരുന്നില്ല ഋതുക്കൾ മാറുന്നത്. ഋതുഭേദങ്ങൾ അറിയാത്ത ശലഭങ്ങളെപ്പോലെ ക്ലാസ്സ്മുറികളിൽ ഞങ്ങൾ.
പക്ഷെ, വേദനയോടെ ശലഭങ്ങൾ തിരിച്ചറിയുന്നു ഇപ്പോൾ ശിശിരമാണ് ....
ഇലകൾ പൊഴിക്കാൻ സമയമായിരിക്കുന്നു ....
പറന്നകന്നേപറ്റൂ ....
കാലത്തിന്റെ തൂലികകൊണ്ട് സൗഹാർദത്തിന്റെ കൈയ്യൊപ്പുമായ് ഞങ്ങൾ വിടപറയുന്നു....
Al Ameen Engineering college [2009-13 EC batch] ലെ ദിനങ്ങളെകുറിച്ച് 2013 ൽ എഴുതിയത് .
