പെണ്ണേ

പെണ്ണേ,
നിന്‍റെ ഉദരത്തിലല്ലോ
അവരും തളിര്‍ത്തത്
നിന്‍റെ മുലയിലെ തീര്ത്ഥമല്ലോ
അവരും നുകര്‍ന്നത്
നിന്‍റെ താരാട്ടുപാട്ടിന്‍റെ ഈണത്തിലല്ലോ
അവരും വളർന്നത് .
പിന്നെയെന്തേ
ഒടുന്ന ബസ്സിലും
തീവണ്ടി മുറിയിലും
തിരിയാതെ തിരിയുന്ന ഭൂമി-
യുടെയോരോ നിശാതെരുവിലും
അവർ നിന്‍റെമാറിലെ നഗ്ന-
ശിൽപ്പങ്ങൾ തേടിയിറങ്ങി.
ഉദരങ്ങളിലേക്കളവുകോലുകൾ കയറ്റി
ചോരയുടെ ആഴം നോക്കി .

നിയ്യറിയുക,

നിന്‍റെ മുറിവേറ്റ രോദനത്തിലും
അവര്‍ക്കുള്ള രാഗതാളങ്ങളുണ്ട് പെണ്ണേ.
അരങ്ങത്തു നില്ക്കാനാകില്ല നിനക്കിനി
മടങ്ങുക വന്നവഴിയേ
മടങ്ങുക നീയടുക്കളയിലേക്ക് .
മടങ്ങട്ടേ ഞാനുമൊരു നിശാതെരുവിലേക്ക്
വീണ്ടുമൊരു ഗസ്സൽരാഗത്തിനായ് കാതോർക്കട്ടെ.