മേല്‍വിലാസം

എനിക്കുചുറ്റും ഞാൻ മാത്രമാകുന്ന
ഇടവേളകളിൽ
വൃക്ഷത്തിന്റെ ജലം തേടിപ്പോയ
വേരുകൾ പോലെ
എന്നിൽ നിന്നും ചിലവേരുകൾ
നിന്നെതേടി ഇറങ്ങിപോകാറുണ്ട്
അവക്ക് നിന്നെ കണ്ടെത്താനാകതെ
തിരിച്ചുപോരേണ്ടിവരുമ്പോൾ
എന്നെങ്കിലും നീ അറിയുവാൻ വേണ്ടിമാത്രം
എൻറെ മേൽവിലാസം (ഭ്രാന്താലയം)
ആ വഴിവക്കിലെ
ചെമ്പരത്തിച്ചെടിയിൽ
രേഖപെടുത്താറുണ്ടവർ.
ആ ചുവന്ന രേഖപ്പെടുത്തലുകൾ
എന്റെ ഞരമ്പിലെ
നീമാത്രമുള്ള എന്റെ മുറിവിലെ
എന്റെ അവസാനത്തെ വിശുദ്ധ രക്തംകൊണ്ടാണ്.